الاستاذ غيتومي يقطر الشمع على المسؤولين بمدينة الجديدة

في هاذ المدينة والله ما بقاينة عارفين نوقفو ولا نزيدو

كاع الوظائف ديال مدينة الجديدة شبه معطلة ، لي خسرت والله ما كاتصاوب، اليوم هاذ الضو لي كينظم المرور شاعل بالأخضر وبالأحمر في نفس الوقت ، واش ندوزو ولا نوقفو في الحقيقة والله حتى مدينة ” بيريمي” واش هاذ المجلس كاع أعلن الاستقالة من التسيير ديال الشأن المحلي ، نيت خلي هاذ الضو جد بوه يشعل ديما بالأحمر، المدينة واقفة واقفة .

لكن واسي الباشا وسعادة القياد ديال المقاطعات السبعة، هاذا دوركم في تغيير المنكر ، راه كان الباشوات لي سبقوكم ورجال السلطة ماشي سادين عليهم في البيروات، كيدورو في المجال ديالهم الترابي وكيسجلو الهفوات والخصاص ديال المدينة ، وكيحركو المنتخبين، راه كان الباشا مولاي الطيب العلوي الله يرحمو قبل ما يدخل البيرو ديالو كيدير دورة على المدينة ويسجل كاع الحوايج السوداء ، وملي كيوصل البلدية كينوض النار في لا كار و في المنتخبين والتقنيين والمهندسين باش ينوضو يقومو بالمسؤولية لي على عاتقهم.

هاذ الضو دابا لي خاسر إيوا سير ضيم غادي يبقى فحال هاكا
في الحقيقة حكرتونا في هاذ المدينة …. والله حتى خاصكم ماشي زيارة ملكية ولكن غضبة ملكية لأن مدينتنا ما كتساهل هاذ شي لي وصلت ليه.
و من جهتنا ما أحوجنا لعودة الأقلام الحرة لرصد الواقع المزري الذي تعيشه مدينة الجديدة و ساكنتها……